برطانیہ کی معروف کمپنی ‘بو’ نے دنیا کی تیز ترین الیکٹرک اسکوٹر “ٹربو” کی رونمائی کر دی ہے، جو حیران کن طور پر 100 میل فی گھنٹہ (تقریباً 160 کلومیٹر فی گھنٹہ) کی رفتار سے سفر کرنے کی صلاحیت رکھتی ہے۔
کمپنی کے سی ای او آسکر مورگن کے مطابق جیسے جیسے ٹربو کی تیاری کا عمل آگے بڑھتا گیا، ہمیں احساس ہوا کہ ہم ایک ’مونسٹر‘ تخلیق کر رہے ہیں۔
ان کا کہنا تھا کہ ای-اسکوٹرز شہروں میں مقامی سطح پر سفر کے طریقوں میں انقلابی تبدیلی لا رہے ہیں، تاہم ابھی انہیں مین اسٹریم آٹو موٹیو کلچر میں پوری طرح شامل نہیں کیا گیا۔
کمپنی کے مطابق ٹربو اس سمت میں ایک اہم قدم ہے، جو الیکٹرک وہیکلز کو اعلیٰ کارکردگی والی گاڑیوں کی صف میں لا کھڑا کرے گا، یہ جدید اسکوٹر 18 ماہ کی محنت کے بعد تیار کیا گیا ہے اور اس کی ابتدائی قیمت 29,500 امریکی ڈالر مقرر کی گئی ہے۔
ٹربو میں 24,000 واٹ کا ڈوئل موٹر پروپلژن سسٹم نصب ہے، جو اس کی رفتار اور کارکردگی کو نئی بلندیوں تک لے جاتا ہے۔
اس کے علاوہ اس میں 1,800 واٹ آور کی طاقتور بیٹری موجود ہے، جو اتنی توانائی فراہم کرتی ہے کہ ایک ساتھ تقریباً 1,500 آئی فونز کو فاسٹ چارج کیا جا سکتا ہے۔
یہ اسکوٹر نہ صرف رفتار میں سبقت رکھتی ہے بلکہ مستقبل کی الیکٹرک موٹرنگ میں ایک نئے باب کا آغاز بھی ہے۔
