اسرائیل کے بعد اسپین کی پولیس بھی فلوٹیلا کارکنان پر ٹوٹ پڑی، بدترین تشدد کی ویڈیو وائرل
علاقائی پولیس فورس کے مطابق واقعے میں چار افراد کو گرفتار کیا گیا ہے جن پر پولیس مزاحمت اور اہلکاروں پر حملے کے الزامات ہیں
-
ویب ڈیسک -
غزہ کے لیے روانہ ہونے والے فلوٹیلا مشن سے وابستہ کارکنان کی اسپین واپسی ایک بڑے تنازع میں بدل گئی، جہاں اسرائیلی حراست سے رہائی کے بعد آنے والے افراد اور ان کے حامیوں کو ایئرپورٹ کی پولیس نے بدترین تشدد کا نشانہ بنایا جس کی ویڈیو سوشل میڈیا پر وائرل ہو گئی۔
یہ واقعہ اسپین کے شمالی شہر بلباؤ کے ایئرپورٹ پر پیش آیا، جہاں بلباؤ ایئرپورٹ کے اندر بڑی تعداد میں لوگ فلوٹیلا کارکنان کے استقبال کے لیے موجود تھے۔
ذرائع کے مطابق کشیدگی اس وقت شروع ہوئی جب ایک کارکن کے قریبی رشتہ دار کو ملاقات سے روکا گیا جس پر تلخ کلامی بڑھتی گئی اور صورتحال ہاتھا پائی میں تبدیل ہو گئی۔
وائرل ہونے والی ویڈیوز میں دیکھا جا سکتا ہے کہ پولیس اہلکاروں نے ہجوم کو منتشر کرنے کے لیے لاٹھی چارج کیا جس کے دوران متعدد افراد کو زمین پر گرتے اور گھسیٹتے ہوئے بھی دیکھا گیا۔
علاقائی پولیس فورس کے مطابق واقعے میں چار افراد کو گرفتار کیا گیا ہے جن پر پولیس مزاحمت اور اہلکاروں پر حملے کے الزامات ہیں۔
پولیس کا کہنا ہے کہ واقعے کی مکمل تحقیقات شروع کر دی گئی ہیں تاکہ یہ جانچا جا سکے کہ کارروائی موجودہ ضوابط کے مطابق تھی یا نہیں۔
سرکاری نشریاتی ادارے کے مطابق گرفتار ہونے والوں میں وہ دو کارکن بھی شامل ہیں جو حال ہی میں اسرائیلی حراست سے رہا ہو کر واپس آئے تھے جس کے بعد معاملہ مزید توجہ کا مرکز بن گیا ہے۔