ڈونلڈ ٹرمپ نے لبنان اور اسرائیل کے درمیان 10 روزہ جنگ بندی کا اعلان کر دیا
اس اعلان سے قبل ایک مجوزہ اعلیٰ سطحی رابطے کا بھی ذکر سامنے آیا تھا
-
ویب ڈیسک -
امریکا کے صدر ڈونلڈ ٹرمپ نے اعلان کیا ہے کہ اسرائیل اور لبنان کے درمیان 10 روزہ جنگ بندی پر اتفاق ہو گیا ہے، جو مقامی وقت کے مطابق رات 12 بجے سے نافذ العمل ہو گی۔
اپنے سوشل میڈیا پلیٹ فارم پر جاری بیان میں ڈونلڈ ٹرمپ نے کہا کہ انہوں نے لبنان کے صدر جوزف آیون اور اسرائیلی وزیراعظم سے تفصیلی اور مثبت گفتگو کی، جس کے بعد دونوں فریقین نے عارضی جنگ بندی پر رضامندی ظاہر کی۔
ٹرمپ کے مطابق یہ جنگ بندی خطے میں امن کی جانب پہلا قدم ہے اور اس کا مقصد آئندہ 10 دنوں کے دوران کشیدگی کو کم کرنا ہے۔
انہوں نے مزید بتایا کہ امریکی نائب صدر جے ڈی وینس، وزیر خارجہ مارکو روبیو اور جوائنٹ چیفس آف اسٹاف کے چیئرمین جنرل ڈین کین کو ہدایت دی گئی ہے کہ وہ فریقین کے ساتھ مل کر مستقل امن کے لیے کوششیں کریں۔
رپورٹ کے مطابق اس اعلان سے قبل ایک مجوزہ اعلیٰ سطحی رابطے کا بھی ذکر سامنے آیا تھا، تاہم بعض تحفظات کے باعث صورتحال غیر یقینی رہی۔ اس کے باوجود جنگ بندی کے اعلان نے خطے میں وقتی طور پر کشیدگی میں کمی کی امید پیدا کر دی ہے۔