مجتبیٰ خامنہ ای دنیا کے کسی بھی حصے میں ہوں نشانہ بنائیں گے، اسرائیل کی دھمکی
ایرانی حکام کے مطابق یہ تمام دعوے بے بنیاد ہیں اور انہیں نفسیاتی جنگ قرار دیا گیا ہے
-
ویب ڈیسک -
اسرائیل نے ایران کی اعلیٰ قیادت سے متعلق انتہائی سخت اور غیر معمولی بیان جاری کیا ہے۔
واشنگٹن میں سامنے آنے والی اطلاعات کے مطابق اسرائیلی حکام نے واضح کیا ہے کہ ایران کی قیادت میں شامل وہ افراد جو اسرائیل کے لیے خطرہ تصور کیے جاتے ہیں، انہیں دنیا کے کسی بھی حصے میں تلاش کرکے نشانہ بنایا جا سکتا ہے۔ اس بیان نے خطے میں پہلے سے موجود تناؤ کو مزید بڑھا دیا ہے۔
اسرائیلی فوج کے ترجمان ایفی ڈیفرین نے میڈیا سے گفتگو میں کہا کہ مجتبیٰ خامنہ ای کے موجودہ مقام کے بارے میں حتمی معلومات نہیں، تاہم اسرائیل اپنے مخالفین کا تعاقب جاری رکھے گا۔
ان کا کہنا تھا کہ اسرائیل کے خلاف سرگرمیوں میں ملوث عناصر کہیں بھی ہوں، کارروائی سے محفوظ نہیں رہیں گے۔
دوسری جانب ایران نے ان خبروں کو سختی سے مسترد کر دیا ہے جن میں دعویٰ کیا گیا تھا کہ مجتبیٰ خامنہ ای زخمی ہونے کے بعد روس منتقل ہو گئے ہیں۔
ایرانی حکام کے مطابق یہ تمام دعوے بے بنیاد ہیں اور انہیں نفسیاتی جنگ قرار دیا گیا ہے۔
