180 ہزار کی حد ٹوٹ گئی: پاکستان اسٹاک ایکسچینج میں 908 پوائنٹس کی بڑی مندی
کاروبار کے دوران سرمایہ کاروں میں محتاط رویہ غالب رہا
-
ویب ڈیسک -
پاکستان اسٹاک ایکسچینج میں کاروباری ہفتے کے آخری روز شدید مندی دیکھنے میں آئی، جہاں ہنڈرڈ انڈیکس 908 پوائنٹس کی کمی کے بعد 1 لاکھ 79 ہزار 603 پوائنٹس پر بند ہوا۔ اس طرح مارکیٹ 1 لاکھ 80 ہزار کی اہم نفسیاتی حد برقرار رکھنے میں ناکام رہی۔
دن بھر کی صورتحال
ٹریڈنگ کے دوران مارکیٹ میں اتار چڑھاؤ جاری رہا، انڈیکس کی بلند ترین سطح 180,832 پوائنٹس رہی جبکہ کم ترین سطح 178,237 پوائنٹس تک گر گئی۔
کاروبار کے دوران سرمایہ کاروں میں محتاط رویہ غالب رہا، جس کے باعث دن کے اختتام پر نمایاں کمی ریکارڈ کی گئی۔
کاروباری حجم اور حصص کی صورتحال
آج مارکیٹ میں تقریباً 38 ارب روپے مالیت کے 70 کروڑ شیئرز کا لین دین ہوا، مجموعی طور پر 565 کمپنیوں کے حصص کا کاروبار ہوا، جن میں سے 194 کمپنیوں کے شیئرز کی قیمتوں میں اضافہ ہوا، جبکہ 140 کمپنیوں کے حصص کی قیمتوں میں کمی دیکھی گئی۔
ماہرین کے مطابق سرمایہ کار آئندہ ہفتے کے معاشی و پالیسی اعلانات پر نظریں جمائے ہوئے ہیں، جو مارکیٹ کی سمت کا تعین کر سکتے ہیں۔