عالمی بینک کے صدر اجے بنگا پاکستان پہنچ گئے، 10 سالہ پارٹنرشپ پر پیشرفت متوقع
عالمی بینک فریم ورک کے تحت 2035تک پاکستان کو 20 ارب ڈالرفراہم کرے گا
-
عمر حیات خان -
اسلام آباد: عالمی بینک کے صدر اجے بنگا ایک اہم دورے پر پاکستان پہنچ گئے ہیں اور وہ 4 فروری تک پاکستان میں قیام کریں گے۔
ذرائع کے مطابق اپنے دورے کے دوران عالمی بینک کے صدر اعلیٰ سرکاری حکام سے ملاقاتیں کریں گے، جن میں وزیراعظم، ڈپٹی وزیراعظم، وزیر خزانہ، وزیر توانائی اور اقتصادی امور سے متعلق حکام شامل ہیں۔
اجے بنگا کے دورہ پاکستان کے دوران معاشی اصلاحات، ترقیاتی منصوبوں کی ترجیحات اور بھارت کے ساتھ جاری آبی تنازعے پر بھی تبادلہ خیال متوقع ہے۔
ذرائع نے بتایا ہے کہ پاکستانی حکام عالمی بینک کے صدر کو ملک میں جاری اور مجوزہ معاشی اصلاحات سے آگاہ کریں گے۔
ذرائع کے مطابق عالمی بینک کے ساتھ 10 سالہ کنٹری پارٹنرشپ فریم ورک پر عمل درآمد کے حوالے سے بھی اہم پیش رفت متوقع ہے۔
اس کے علاوہ عالمی بینک اس فریم ورک کے تحت 2035تک پاکستان کو 20 ارب ڈالرفراہم کرے گا، جو مختلف ترقیاتی اور معاشی منصوبوں پر خرچ کیے جائیں گے۔
تاہم، یہ دورہ پاکستان اور عالمی بینک کے درمیان اقتصادی تعاون کو مزید مستحکم کرنے میں اہم ثابت ہوسکتا ہے۔