مشکل کی اس گھڑی میں پاکستانی عوام کے ساتھ کھڑے ہیں، شاہ چارلس
برطانیہ کے فرمانروا شاہ چارلس سوم نے پاکستان میں حالیہ مون سون بارشوں کے نتیجے میں پیدا ہونے والی سیلابی تباہی اور ہیلی کاپٹر حادثے پر گہرے دکھ اور افسوس کا اظہار کرتے ہوئے وزیراعظم پاکستان شہباز شریف کے نام ایک خصوصی تعزیتی پیغام ارسال کیا ہے۔
اپنے پیغام میں شاہ چارلس نے کہا کہ میں اور میری اہلیہ حالیہ مون سون کے نتیجے میں پاکستان میں ہونے والے جانی نقصان، بڑے پیمانے پر تباہی اور ہیلی کاپٹر حادثے کے بارے میں جان کر سخت دل گرفتہ ہیں۔
شاہ چارلس نے سیلاب سے متاثرہ افراد کے ساتھ دلی ہمدردی کا اظہار کرتے ہوئے کہا کہ سیلاب کی تباہ کاریوں کا پیمانہ واقعی دل دہلا دینے والا ہے۔ ہم ان تمام افراد کے غم میں برابر کے شریک ہیں جنہوں نے اپنے پیارے، گھر یا ذریعہ معاش کھویا۔
انہوں نے مزید کہا کہ برطانیہ اور پاکستان کے مابین پائیدار اور گہرے تعلقات قائم ہیں، اور برطانیہ میں ایسے بہت سے خاندان آباد ہیں جن کے پاکستان کے ساتھ قریبی روابط ہیں۔
ہم ان خاندانوں کے ساتھ بھی دلی ہمدردی اور یکجہتی کا اظہار کرتے ہیں۔ یہ ایک ایسا سانحہ ہے جس کی تکلیف بین الاقوامی سطح پر محسوس کی جا رہی ہے۔
شاہ چارلس نے پاکستانی عوام کے ساتھ مکمل یکجہتی کا اظہار کرتے ہوئے ریسکیو اہلکاروں، امدادی ٹیموں، رضاکاروں اور مقامی کمیونٹیز کی بے لوث خدمات کو خراج تحسین پیش کیا
انہوں نے مزید کہا کہ یہ تمام افراد خطرے میں گھرے لوگوں کی جان بچانے، ریلیف پہنچانے اور بحالی کی کوششوں میں ایک شمع کی مانند امید کی کرن بنے ہوئے ہیں۔ ہم ان کی ہمت اور عزم کو بے حد سراہتے ہیں۔
