امریکی صدر ڈونلڈ ٹرمپ ستمبر میں پاکستان کا دورہ کریں گے۔
ذرائع کے مطابق ڈونلڈ ٹرمپ کا دورہ جنوبی ایشیا کے تناظر میں ہو گا، دورے کے دوران امریکی صدر بھارت بھی جائیں گے، جہاں وہ کواڈ کانفرنس میں شرکت کریں گے۔
ذرائع نے بتایا کہ صدر ٹرمپ بھارت کے سرکاری دورے سے قبل اسلام آباد پہنچیں گے، جہاں ان کی ملاقات صدر مملکت آصف علی زرداری، وزیراعظم شہباز شریف، اور چیف آف آرمی اسٹاف جنرل عاصم منیر سے طے شدہ ہے۔ اس موقع پر دو طرفہ تعلقات، سیکیورٹی امور اور خطے کی مجموعی صورتحال پر گفتگو متوقع ہے، جبکہ اہم معاہدوں پر دستخط بھی کیے جانے کا امکان ہے۔
ذرائع کا کہنا ہے کہ اگر صدر ٹرمپ پاکستان کا دورہ کرتے ہیں تو یہ سابق صدر جارج ڈبلیو بش کے بعد کسی بھی امریکی صدر کا پہلا دورہ پاکستان ہوگا، جس سے دونوں ممالک کے تعلقات میں ایک نئے باب کا آغاز متوقع ہے۔
صدر ٹرمپ کے دورہ پاکستان کے حوالے سے امریکی وزیر خارجہ مارکو روبیو نے اہم کردار ادا کیا ہے۔
یہ بھی پڑھیں: امریکی صدر ڈونلڈ ٹرمپ نوبیل امن انعام کیلئے باضابطہ طور پر نامزد
ذرائع نے بتایاکہ امریکی صدر کے مجوزہ دورے کے پیش نظر پاکستانی سفارتی حلقے متحرک ہوگئے ہیں جبکہ دوسری جانب وزارت خارجہ نے امریکی سفارت خانے سے ممکنہ شیڈول پر رابطے تیز کر دیے ہیں۔
ذرائع کا کہنا ہے کہ صدر ٹرمپ 17 سے 19 ستمبر تک برطانیہ کا اسٹیٹ وزٹ بھی کریں گے، دورے کی حتمی تاریخ اور شیڈول پر دونوں ممالک میں مشاورت جاری ہے۔
سفارتی ذرائع کا کہنا ہے کہ ڈونلڈ ٹرمپ کا بطور صدر پاکستان آنا اہم سفارتی پیش رفت ہو گی۔
