اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت (آرٹس ریگولر گروپ) کے سالانہ امتحانات 2025ء کے نتائج جاری کردیے۔
چیئرمین انٹربورڈ کراچی فقیر محمد لاکھو کے مطابق پہلی پوزیشن ہنس راج ولد مکیش کمار (رول نمبر 938852) نے حاصل کی جو آئی ڈے اے، آر آئی ای یو ہائر سیکنڈری اسکول فار بلائنڈ اینڈ ڈیف کے طالب علم ہیں۔انہوں نے 1100 میں سے 953 نمبر لے کر اے ون گریڈ کے ساتھ ٹاپ کیا۔
دوسری پوزیشن انشراح بنت محمد امین (رول نمبر 950006) نے حاصل کی جو اقراء حفاظ گرلز سائنس کالج بلاک بی نارتھ ناظم آباد کی طالبہ ہیں۔ انہوں نے 936 نمبر اور اے ون گریڈ حاصل کیا۔
اسی کالج کی طالبہ سیدہ خضرا امیر بنت سید رزاق امیر (رول نمبر 950012) 934 نمبر لے کر اے ون گریڈ کے ساتھ تیسرے نمبر پر رہیں۔
کامیابی کا تناسب
ناظم امتحانات زرینہ راشد کے مطابق آرٹس ریگولر گروپ کے امتحانات میں 10 ہزار 55 طلبہ نے رجسٹریشن کرائی جن میں سے 9 ہزار 488 شریک ہوئے۔ ان میں سے 3 ہزار 876 امیدوار کامیاب قرار پائے، یوں کامیابی کا تناسب 40.85 فیصد رہا۔
گریڈز کی تقسیم
امتحانات میں 20 طلبہ اے ون گریڈ، 236 نے اے گریڈ، 793 نے بی گریڈ، 1353 نے سی گریڈ، 1328 نے ڈی گریڈ جب کہ 146 نے ای گریڈ حاصل کیا۔ مزید برآں 2 طلبہ محض پاس ہونے میں کامیاب رہے۔
نتائج تک رسائی
نتائج بورڈ کی ویب سائٹ www.biek.edu.pk پر اپ لوڈ کردیے گئے ہیں۔ طلبہ بورڈ کی آفیشل اینڈرائڈ ایپ BIEK کے ذریعے بھی اپنے نتائج دیکھ سکتے ہیں جو گوگل پلے اسٹور پر دستیاب ہے۔
چیئرمین کا پیغام
چیئرمین انٹربورڈ فقیر محمد لاکھو نے کامیاب طلبہ کو مبارکباد پیش کی اور بتایا کہ پوزیشن ہولڈرز کے اعزاز میں خصوصی تقریبات کا انعقاد کیا جا رہا ہے۔
انہوں نے کہا کہ حال ہی میں سائنس پری انجینئرنگ گروپ کے نمایاں طلبہ کو میرٹ سرٹیفکیٹس دیے گئے ہیں جب کہ دیگر گروپس کے نمایاں طلبہ کے لیے بھی جلد تقاریب منعقد ہوں گی۔
