پاکستانی وکٹ کیپر بیٹر اعظم خان نے پہلی بار اعتراف کیا ہے کہ مسلسل کرکٹ کھیلنے اور غیر صحت مند عادات نے انہیں اپنی فٹنس پر توجہ دینے سے روکے رکھا۔
اعظم خان کا شمار حالیہ برسوں کے ان کھلاڑیوں میں ہوتا ہے جن پر سب سے زیادہ تنقید ہوتی ہے اور ان کی صلاحیتوں کے بجائے زیادہ تر بحث ان کے وزن کے گرد گھومتی رہتی ہے۔
ایک انٹرویو کے دوران اعظم خان نے کہا ’’اس وقت میں نیشنل کرکٹ اکیڈمی لاہور میں فٹنس اور اپنی بیٹنگ پر کام کر رہا ہوں۔ وزن کم کرنے میں ہفتے یا دن نہیں بلکہ وقت لگتا ہے۔ گزشتہ چار پانچ سالوں میں میں اتنی کرکٹ کھیل رہا تھا کہ فٹنس پر صحیح طرح فوکس نہیں کر پایا‘‘۔
انہوں نے تسلیم کیا کہ کھانے پینے کی عادات بھی ان کی فٹنس مسائل کی بڑی وجہ رہیں تاہم اب وہ انہیں سدھارنے کے لیے پرعزم ہیں۔
وکٹ کیپر و بیٹر کا کہنا تھا کہ اگرچہ وہ قومی ٹیم میں مستقل جگہ نہیں بنا پائے لیکن دنیا بھر کی ٹی ٹوئنٹی لیگز میں ان کی موجودگی رہی۔ انہوں نے کہا کہ قومی ٹیم میں دوبارہ جگہ بنانے کے لیے انہیں دوگنا محنت کرنا ہوگی۔
ان کا کہنا تھا ’’دنیا میں بہت سے کھلاڑی آئے اور پھر غائب ہوگئے۔ اگر مجھے خود کو برقرار رکھنا ہے تو باقی سب سے زیادہ محنت کرنی ہوگی۔ میرا ہدف بین الاقوامی سطح پر لمبا کیریئر ہے‘‘۔
اعظم خان نے زور دیا کہ ان کا سفر ابھی ختم نہیں ہوا اور فٹنس پر کام کرکے وہ قومی ٹیم کے مستقبل کا حصہ بننے کے خواہشمند ہیں۔
واضح رہے کہ قومی ٹیم کے ہیڈ کوچ مائیک ہیسن پہلے ہی سلیکشن کے لیے معیار واضح کرچکے ہیں اور اگر اعظم اپنی فٹنس بہتر بنانے میں کامیاب ہوگئے تو وہ دوبارہ قومی اسکواڈ میں جگہ بناسکتے ہیں۔