بیٹنگ ایپ کیس؛ کیا ڈکی بھائی نے اعترافِ جرم کرلیا؟

پاکستان کے معروف یوٹیوبر سعد الرحمان عرف ڈکی بھائی نے آن لائن بیٹنگ ایپس کی تشہیر سے متعلق کیس میں اپنے جرم کا اعتراف کرتے ہوئے عوام سے معافی مانگ لی ہے۔

ڈکی بھائی کو 16 اگست کو آن لائن سٹے بازی اور بیٹنگ ایپس کی پروموشن میں ملوث ہونے پر گرفتار کر کے نیشنل سائبر کرائم انویسٹی گیشن ایجنسی کے حوالے کیا گیا تھا۔

 ابتدائی طور پر عدالت نے ان کا دو روزہ جسمانی ریمانڈ منظور کیا، جس میں بعد ازاں 4 روز کی توسیع کی گئی۔ اب تازہ ترین پیشی میں عدالت نے مزید 5 روزہ جسمانی ریمانڈ کی منظوری دے دی ہے۔

وائرل ویڈیو میں دیکھا جاسکتا ہے کہ عدالت کے باہر میڈیا سے گفتگو کرتے ہوئے ڈکی بھائی نے اپنے ماضی کے رویے اور روسٹنگ ویڈیوز پر بھی معافی مانگی۔

ان کا کہنا تھا کہ میں روسٹنگ کے زمانے سے غیر اخلاقی ویڈیوز بناتا رہا ہوں، جس پر پوری قوم سے معافی مانگتا ہوں۔

ڈکی بھائی نے مزید کہا کہ کچھ ایپس کی پروموشن کی پیشکش ملی، جو کہ پی ایس ایل میچز کے دوران ٹی وی پر عام دکھائی دیتی تھیں، میں نے بغیر تصدیق کے ان ایپس کی تشہیر کی، یہ جانے بغیر کہ وہ قانونی ہیں یا نہیں، اس پر بھی معذرت خواہ ہوں۔

متعلقہ خبر: مشکلات بڑھ گئیں ، ڈکی بھائی کے جسمانی ریمانڈ میں مزید 5 دن کی توسیع

واضح رہے کہ اس کیس میں ڈکی بھائی کی اہلیہ عروب جتوئی بھی نامزد ہیں، لاہور کی سیشن عدالت نے ان کی عبوری ضمانت منظور کرتے ہوئے 30 اگست تک گرفتاری سے روک دیا ہے۔

سعد الرحمان کے اعتراف اور عوامی معافی کے بعد سوشل میڈیا پر اس معاملے پر شدید بحث جاری ہے جبکہ ایف آئی اے اور متعلقہ ادارے معاملے کی مزید تفتیش کر رہے ہیں۔

مزید پڑھیں: گرفتاریاں صرف چھوٹے انفلوئنسرز کی ہی کیوں؟ ڈکی بھائی کی گرفتاری پر رجب بٹ کا ردعمل