کراچی کے علاقے صدر پارکنگ پلازہ کے قریب آتش بازی کے سامان کے گودام میں دھماکہ ہوا جس کے نتیجے میں آگ بھڑک اٹھی۔ واقعے میں 10 افراد کے زخمی ہونے کی اطلاع ملی ہے۔
دھماکے کی آواز دور دور تک سنی گئی جس سے علاقے میں خوف و ہراس پھیل گیا۔ واقعے کی اطلاع ملتے ہی پولیس اور ریسکیو ادارے جائے وقوعہ پر پہنچ گئے۔
فائر بریگیڈ حکام کے مطابق کے ایم سی کی جانب سے پانچ فائر ٹینڈرز اور ایک باؤزر آگ بجھانے کے لیے روانہ کیے گئے ہیں۔ ریسکیو اور فائر بریگیڈ اہلکار پولیس کے ساتھ مل کر امدادی کارروائیوں میں مصروف ہیں۔ حکام کا کہنا ہے کہ آگ پر قابو پانے کی بھرپور کوششیں جاری ہیں۔
ایس ایس پی ساوتھ کے مطابق دھماکے اور آگ کے نتیجے میں دس افراد زخمی ہوئے ہیں۔ ان میں سے زیادہ تر افراد کو قریبی عمارتوں اور دکانوں کے شیشے لگنے سے چوٹیں آئیں۔ زخمیوں کو فوری طور پر اسپتال منتقل کیا گیا جہاں ان کا علاج جاری ہے۔
ڈی آئی جی ساوتھ اسد رضا نے بتایا کہ پولیس جائے وقوعہ پر موجود ہے اور علاقے کو گھیرے میں لے لیا گیا ہے تاکہ مزید کسی ناخوشگوار واقعے سے بچا جا سکے۔ پولیس نے واقعے کی تحقیقات بھی شروع کر دی ہیں تاکہ دھماکے کی اصل وجوہات معلوم کی جا سکیں۔
ابتدائی اطلاعات کے مطابق کسی جانی نقصان کی اطلاع موصول نہیں ہوئی۔ تاہم، دھماکے اور آگ کی شدت کے باعث قریبی دکانوں اور عمارتوں کو بھی نقصان پہنچا ہے۔ حکام نے شہریوں سے اپیل کی ہے کہ جائے وقوعہ کے قریب نہ جائیں تاکہ امدادی کارروائیوں میں رکاوٹ نہ ہو۔