پاکستان کی معروف اداکارہ مشعل خان نے اداکاری کو خیرباد کہنے کی وجہ بتاتے ہوئے کہا ہے کہ وہ اب زندگی میں ایک نئے سفر پر نکل چکی ہیں، جہاں ان کی ترجیحات تعلیم، تحقیق اور پیشہ ورانہ ترقی ہیں۔
حال ہی میں اداکارہ نے سوشل میڈیا پر اپنی تصاویر کے ساتھ ایک تفصیلی پیغام شیئر کیا، جس میں انہوں نے وضاحت کی کہ انہوں نے شوبز کو اس لیے چھوڑا تاکہ وہ ایک مثبت، علمی اور بامقصد زندگی گزار سکیں۔
مشعل خان نے لکھا کہ زندگی اس وقت واقعی بدلتی ہے جب انسان محنت اور علم کو ترجیح دیتا ہے، بجائے اس کے کہ دوسروں کو نقصان پہنچا کر فائدہ حاصل کرے۔
اداکارہ کے مطابق وہ اب اداکاری نہیں کر رہیں بلکہ فنانس کے شعبے میں تعلیم اور تحقیق سے وابستہ ہیں، تعلیم اور مسلسل سیکھنے کو وہ زندگی میں سب سے زیادہ اہمیت دیتی ہیں۔
مشعل خان اب ایک فنانس کوچ، ایڈوائزر اور اینکر کے طور پر اپنی نئی شناخت بنا چکی ہیں، وہ سرمایہ کاری، مالیاتی تعلیم اور مشاورت کے شعبے میں کام کر رہی ہیں جبکہ سوشل میڈیا پر متعدد صارفین ان سے بزنس اور انویسٹمنٹ کے حوالے سے مشورے لیتے ہیں۔
ان کے مداحوں اور فالوورز نے اداکارہ کے اس فیصلے کو سراہا اور تعلیم کو ترجیح دینے پر ان کی بھرپور تعریف کی۔