پاکستان نے اسرائیل کے غزہ پر مکمل قبضے کے منصوبہ کو خطرناک اشتعال انگیزی قرار دیتے ہوئے اسرائیل کو اسلحے کی سپلائی بند کرنے کا مطالبہ کردیا۔
اقوام متحدہ کی سلامتی کونسل کا ہنگامی اجلاس اسرائیل کے غزہ پر مکمل قبضے کے منصوبے پر طلب کیا گیا، جہاں پاکستانی مستقل مندوب عاصم افتخار نے اسرائیلی اقدامات کو عالمی قوانین کی سنگین خلاف ورزی قرار دیا۔
انہوں نے کہا کہ اسرائیل کا یہ منصوبہ نہ صرف انتہائی خطرناک اور اشتعال انگیز ہے بلکہ امن کے لیے جاری عالمی کوششوں کو بھی شدید نقصان پہنچا رہا ہے۔
مزید پڑھیں: امدادی قافلوں پرحملے سوچا سمجھامنصوبہ تھا،اسحاق ڈار،سلامتی کونسل میں صدارتی خطاب
عاصم افتخار نے کہا کہ اب تک عالمی برادری نے اسرائیل کو اس جارحانہ اقدام سے روکنے کے لیے کوئی مؤثر قدم نہیں اٹھایا۔ لاکھوں فلسطینیوں کو زبردستی گھر چھوڑنے پر مجبور کیا جا رہا ہے جبکہ غزہ میں بمباری اور ہزاروں اموات کا سلسلہ جاری ہے۔
انہوں نے واضح کیا کہ اسرائیل فلسطینیوں کو ان کی زمین سے بے دخل کرکے قبضہ جمانا چاہتا ہے، جو کہ ناقابل قبول ہے۔ عاصم افتخار نے اسرائیل کو سیاسی و عسکری مدد فراہم کرنے والے ممالک پر زور دیا کہ وہ ذمہ داری کا مظاہرہ کریں اور اپنے فیصلوں پر دوبارہ غور کریں۔
اجلاس میں پاکستانی مندوب نے بتایا کہ وزیراعظم شہباز شریف نے بھی اسرائیلی کابینہ کے فیصلے کو اشتعال انگیزی قرار دیتے ہوئے اس کی سخت مذمت کی ہے، جبکہ عرب اسلامک سمٹ نے بھی متفقہ طور پر اس منصوبے کو مسترد کر دیا ہے۔