مٹیاری: سندھ کے لازوال مفکر، عظیم صوفی شاعر اور بزرگ حضرت شاہ عبداللطیف بھٹائیؒ کے 282ویں سالانہ تین روزہ عرس مبارک آج سے شروع ہوگا۔
حضرت شاہ عبداللطیف بھٹائیؒ کے تین روزہ عرس مبارک کا افتتاح کچھ دیر میں گورنر کے پی کے فیصل کریم کنڈی درگاہ شریف پر چادر چڑھا کر کریں گے، جبکہ اس موقع پر 5 لاکھ سے زائد افراد کی آمد متوقع ہے۔
ایس ایس پی مٹیاری کا کہنا ہے کہ زائرین کی حفاظت کو یقینی بنانے کے لیے 2688 پولیس اہلکار تعینات کیے گئے ہیں، جب کہ 100 لیڈی پولیس اہلکار بھی موجود ہوں گی، اس کے علاوہ 200 رینجرز کو بھی ہائی الرٹ رکھا جائے گا۔
یہ بھی پڑھیں: نیب کا مٹیاری موٹروے کرپشن کیس کی تحقیقات خود کرنے کا فیصلہ
عرس مبارک کی تمام سرگرمیوں کو چھ سیکٹرز میں تقسیم کیا گیا ہے، 37 مقامات کی نشاندہی کی گئی ہے، جہاں 24 گھنٹے پولیس کی مانیٹرنگ ہوگی، مختلف جگہوں پر 5 واک تھرو گیٹ لگائے جائیں گے جبکہ ایک کنٹرول روم قائم کرکے تمام سرگرمیوں کی CCTV کیمروں سے سخت نگرانی کی جائے گی۔
درگاہ پر 150 سے زائد رضا کار موجود ہوں گے، جبکہ بھٹ شاہ ٹاؤن کمیٹی کی طرف سے 200 سے 250 افراد کو کام کے لیے طلب کیا گیا ہے۔
واضح رہے کہ حضرت شاہ عبداللطیف بھٹائیؒ کے عرس کی تقریبات ہر سال ان کی روحانی و ادبی خدمات کے اعتراف میں منعقد کی جاتی ہیں۔ ان کی شاعری اور تعلیمات آج بھی سندھی ثقافت، زبان اور روحانی شناخت پر گہرا اثر رکھتی ہیں۔ عرس کے موقع پر ہر سال ہزاروں عقیدت مند بھٹ شاہ میں واقع ان کے مزار پر حاضری دیتے ہیں۔
حضرت شاہ عبداللطیف بھٹائیؒ کا عرس ہر سال اسلامی مہینے صفر کی 14 ویں تاریخ کو منایا جاتا ہے۔