اسلام آباد: وزیراعظم ہاؤس میں پاکستان اور ایران کے درمیان مختلف شعبوں میں تعاون کے فروغ کے لیے 13 معاہدوں اور مفاہمتی یادداشتوں (ایم او یوز) پر دستخط اور دستاویزات کا تبادلہ کیا گیا۔
اس اہم تقریب میں دونوں ممالک کے اعلیٰ سطحی وفود نے شرکت کی۔ یہ معاہدے ایرانی صدر ڈاکٹر مسعود پزشکیان کے سرکاری دورہ پاکستان کے دوران طے پائے، جنہیں پاکستان کی قیادت کی جانب سے گرم جوشی سے خوش آمدید کہا گیا۔
تقریب میں پاکستان اور ایران کے درمیان سائنس و ٹیکنالوجی اور انفارمیشن ٹیکنالوجی کے شعبوں میں علیحدہ علیحدہ معاہدوں پر دستخط کیے گئے، جن کا مقصد سائنسی تحقیق، ڈیجیٹل ٹیکنالوجی، اور تکنیکی تبادلوں کو فروغ دینا ہے۔
سیاحت، ثقافت اور ورثے کے فروغ کے لیے بھی ایک جامع معاہدے پر دستخط ہوئے، جو دونوں ممالک کے تاریخی اور تہذیبی رشتوں کو مزید مستحکم کرے گا۔
دونوں ممالک نے ماحولیاتی تبدیلی، موسمیاتی اثرات اور قدرتی آفات سے نمٹنے کے شعبے میں تعاون بڑھانے پر اتفاق کیا، جب کہ میری ٹائم سیفٹی اور فائر فائٹنگ میں مہارت کے تبادلے کے لیے بھی معاہدہ طے پایا۔
عدالتی معاونت اور اصلاحات سے متعلق ایم او یو کا تبادلہ بھی کیا گیا، جس کے تحت دونوں ممالک قانون و انصاف کے شعبے میں معلومات، تجربات اور اصلاحاتی اقدامات کا اشتراک کریں گے۔
اس کے علاوہ 2013 میں طے پانے والے ایئر سیفٹی معاہدے کے تحت ایک ذیلی ایم او یو پر بھی دستخط کیے گئے جبکہ مصنوعات کے معیارات (اسٹینڈرڈائزیشن) پر عملدرآمد کے لیے الگ مفاہمتی یادداشت کا تبادلہ ہوا۔
یہ بھی پڑھیں: ایرانی صدر اور وزیراعظم کے درمیان ملاقات، علاقائی صورتحال پر تبادلہ خیال
پاکستان اور ایران نے فری ٹریڈ ایگریمنٹ (FTA) کے مؤثر نفاذ کے لیے ایک مشترکہ اسٹیٹمنٹ کی تیاری پر بھی معاہدہ کیا، جو مستقبل میں آزادانہ تجارتی سرگرمیوں کے لیے راہ ہموار کرے گا۔
دریں اثناء، سیاحتی اور ثقافتی تعاون کے فروغ کے لیے بھی الگ معاہدے پر دستخط ہوئے، جس سے عوامی سطح پر رابطے بڑھانے میں مدد ملے گی۔