فرانس کے دارالحکومت پیرس کے مشہور مقام پلیس دے لا ریپبلک (Place de la République) پر فلسطینیوں کے حق میں بڑا مظاہرہ کیا گیا۔
فلسطینیوں کے حق میں کئے گئے اس مظاہرے میں فرانسیسی شہریوں کے ساتھ ساتھ اراکین پارلیمنٹ، انسانی حقوق کے کارکنوں اور سیاسی رہنماؤں نے بھرپور شرکت کی۔
مظاہرہ “فریڈم فلوٹیلا موومنٹ” (Flotilla for Freedom) کی کال پر منعقد ہوا، جس کا مقصد غزہ کی حمایت اور اسرائیلی محاصرے کے خلاف آواز بلند کرنا تھا۔
مظاہرین نے ہاتھوں میں فلسطینی پرچم، بینرز اور پلے کارڈز اٹھا رکھے تھے جن پر “Free Gaza” اور “Boycott Israel” جیسے نعرے درج تھے۔ شرکاء نے اسرائیلی حکومت کے خلاف شدید نعرے بازی کی اور عالمی برادری سے مطالبہ کیا کہ وہ غزہ میں جاری انسانی بحران کا فوری نوٹس لے اور اسرائیلی قبضے کے خاتمے کے لیے عملی اقدامات کرے۔
مظاہرے میں فرانسیسی پارلیمنٹ کی رکن اور “لا فرانس انسومیز” (France Unbowed) جماعت کی نمایندہ گیبریئل کتھالا (Gabrielle Cathala) بھی شریک تھیں، جو حال ہی میں “ہندالہ فلوٹیلا” (Handala Flotilla) نامی امن مشن کے تحت غزہ جانے والی کشتی پر سوار تھیں۔
اسرائیلی فوج نے 28 جولائی کو بین الاقوامی پانیوں میں اس کشتی کو روک کر اس کے عملے اور رضاکاروں کو زبردستی حراست میں لیا تھا۔
مظاہرے سے خطاب کرتے ہوئے گیبریئل کتھالا نے کہاکہ ہم یہاں فلسطینی عوام کے ساتھ یکجہتی کے لیے جمع ہیں، اور دنیا کو یہ پیغام دینا چاہتے ہیں کہ غزہ کا محاصرہ انسانیت کے خلاف جرم ہے۔
انہوں نے کہا کہ وہ “ہندالہ فلوٹیلا” کا حصہ بن کر فلسطینی عوام کی آواز دنیا تک پہنچانے کی کوشش کر رہی تھیں اور اسرائیلی فوج کا انہیں بین الاقوامی پانیوں میں زبردستی روکنا بین الاقوامی قوانین کی صریح خلاف ورزی ہے۔
مظاہرین نے عالمی برادری پر زور دیا کہ وہ اسرائیلی مظالم کے خلاف آواز بلند کرے اور فلسطینی عوام کو ان کا حق دلانے کے لیے عملی اقدامات کرے۔