چیف آف آرمی اسٹاف فیلڈ مارشل عاصم منیر نے ملتان گریژن کا دورہ کیا، جہاں انہوں نے زیڈ 10 ایم ای اٹیک ہیلی کاپٹر کی شمولیت کی تقریب میں شرکت کی۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف فیلڈ مارشل عاصم منیر نے ملتان گریژن کا دورہ کیا، جہاں کمانڈر نے ان کا استقبال کیا۔
اس دوران فیلڈ مارشل کو کور ہیڈ کوارٹر ملتان میں فارمیشن کی آپریشنل تیاریوں اور جاری تربیتی سرگرمیوں پر بریفنگ دی گئی۔
اس موقع پر فیلڈ مارشل عاصم منیر نے پاک فوج کے اعلیٰ ترین تربیتی معیار اور آپریشنل تیاریوں پر اطمینان کا اظہار کرتے ہوئے پاکستان کی قومی خودمختاری اور علاقائی سلامتی کے بھرپور تحفظ کے عزم کا اعادہ کیا۔
یہ بھی پڑھیں: بھارتی حمایت یافتہ پراکسیز کیخلاف فیصلہ کن کارروائی ناگزیرہے، فیلڈ مارشل عاصم منیر
آرمی چیف نے سول سوسائٹی اور اکیڈیمیا سے بھی ملاقات کی، جس میں قومی اتحاد اور سول ملٹری ہم آہنگی، ہائبرڈ خطرات سے نمٹنے کے لیے قومی یکجہتی اور معاشرتی یگانگت پر زوردیا۔
آرمی چیف نے ملتان گیریژن میں پاک فوج کے لیے جدید Z-10ME اٹیک ہیلی کاپٹر کی شمولیت کی تقریب کی صدارت کی۔ یہ جدید ترین، ہر موسم میں دن و رات کام کرنے والا گن شپ پلیٹ فارم جدید ریڈار، الیکٹرانک وارفیئر سسٹمز اور ہدف شکن ہتھیاروں سے لیس ہے جو دشمن کے فضائی و زمینی اہداف کو مؤثر طریقے سے نشانہ بنانے کی صلاحیت رکھتا ہے۔ Z-10ME کی شمولیت کو پاک فوج کی جدید جنگی حکمت عملی اور ایوی ایشن اپ گریڈیشن میں ایک فیصلہ کن پیش رفت قرار دیا گیا ہے۔
فیلڈ مارشل عاصم منیر نے مظفرگڑھ فیلڈ فائرنگ رینج میں Z-10ME ہیلی کاپٹرز کی جانب سے کیے گئے فائر پاور مظاہرے کا مشاہدہ کیا۔ اس موقع پر پاک فوج کے مختلف یونٹس نے ”کمبائنڈ آرمز ٹیکٹکس“ کا شاندار مظاہرہ پیش کیا۔
فیلڈ مارشل نے جوانوں سے اپنے خطاب میں ان کی پیشہ ورانہ مہارت اورجذبے کی تعریف کرتے ہوئے’’کمبائنڈ آرمز ٹیکٹکس‘‘ کے مظاہرے کو سراہا، اور کہا کہ پاک فوج بدلتے ہوئے جنگی ماحول میں بھی فیصلہ کن برتری برقرار رکھنے کے لیے پوری طرح تیار ہے۔