پاکستان بزنس فورم نے وزیراعظم شہباز شریف سے بڑا مطالبہ کرتے ہوئے کہا کہ پاکستان میں ڈالر 20 روپے مہنگا ہے، وزیراعظم فوری نوٹس لیں، معاشی اعشاریوں کی بنیاد پر اس وقت ڈالر کا ریٹ 260 روپے ہونا چاہیے۔
پاکستان بزنس فورم کے چیف آرگنائزر احمد جواد نے اپنے بیان میں کہا کہ اگر روپے میں 20 روپے کی بہتری آتی ہے تو اسے قرضوں اور مہنگائی میں خاطر خواہ کمی واقع ہوگی۔
ان کا کہنا تھا کہ بدقسمتی سے ہماری پالیسی رہی ہے روپیہ جب بھی گرا اس کو واپس نہیں لایا گیا، معیشت 283 روپے پر نہیں چل سکتی، معنی خیز ریلیف تب ہی آئے گا جب روپیہ مضبوط ہوگا۔
احمد جواد نے کہا کہ مہنگائی کی شرح 4 فیصد کنزیومر پرائس انڈیکس گر کر 3 فیصد پرآ گیا شرح سود کو 11فیصد پر رکھنا غیر منطقی ہے۔
انہوں نے یہ بھی کہا کہ اگلی مانیٹری پالیسی میں شرح سود کو کم از کم 9 فیصد پر لایا جائے، حکومت 50 کھرب روپے کے ملکی قرض پر 11 فیصد سود ادا کر رہی ہے جو سالانہ مہنگائی کی شرح 5 فیصد سے 6 فیصد زیادہ ہےاس کی وجہ سے ملکی قرض کی ادائیگی پر 3 کھرب روپے کا اضافی بوجھ پڑ رہا ہے، جو کہ عوامی فلاح و بہبود اور انفراسٹرکچر جیسے شعبوں پر خرچ کیا جا سکتا ہے۔
احمد جواد کا کہنا تھا کہ شرح سود میں کمی سے پاکستانی برآمدات کو عالمی منڈیوں میں جگہ ملے گی ، آئی ایم ایف بھی شرح سود کو مہنگائی کی شرح کے قریب رکھنے کامطالبہ کرتا ہے۔
انہوں نے کہا کہ برآمدات بڑھانے کے لیے نئے ایونیوز ڈھونڈنے ہوں گے خالی ٹیکسٹائل سے کام نہیں چلے گا، مرکزی بینک نئی مانیٹری پالیسی میں بلوچستان کی بزنس کمیونٹی کے لیے قرض کا حصول بھی یقینی بنایا جائے۔
احمد جواد نے مزید کہا کہ کاروباری طبقہ مایوس ہے کیونکہ پالیسی ساز پیداواری شعبوں کی مشکلات کو نظر انداز کر رہے ہیں، تو قع ہے 30 جولائی کو ہونے والے مانیٹری پالیسی اجلاس میں ترقی دوست، حقیقت پسندانہ مؤقف اپنایا جائے۔