لاہور میں موسلا دھار بارشوں کے بعد لاہور کے سرحدی علاقے گھرکی گاؤں کا شہر سے زمینی رابطہ مکمل طور پر منقطع ہو گیا ہے۔
گزشتہ روز ہونے والی موسلا دھار بارش سے دفاعی نالے پر مٹی سے بنایا گیا عارضی پُل بہہ گیا، جو شہر اور گاؤں کے درمیان رابطے کا واحڈ ذرعیہ تھا، جس کے نتیجے میں گاؤں کے مکین شہر سے کٹ کر رہ گئے ہیں۔
مزید پڑھیں: پنجاب بھر میں مون سون کی شدید بارشیں، 24 گھنٹوں میں 27 افراد جاں بحق، درجنوں زخمی
ذرائع کے مطابق یہ پُل گاؤں اور لاہور شہر کے درمیان آمد و رفت کا واحد ذریعہ تھا، جو کچھ عرصہ قبل عارضی طور پر مٹی سے بنایا گیا تھا۔ بارش کے باعث نالے میں طغیانی آئی، جو اس پُل کو بہا لے گئی۔
پل بہنے کے نتیجے میں گاؤں کے مکین محصور ہو کر رہ گئے ہیں، اہل علاقہ کو اپنے روزمرہ کے معمولات کی انجام دہی کے لیے شدید مشکلات کا سامنا کرنا پڑ رہا ہے۔
گاؤں کے باسیوں نے متعلقہ حکام سے مطالبہ کیا ہے کہ فوری طور پر مستقل پُل کی تعمیر کا آغاز کیا جائے تاکہ بارش یا قدرتی آفات کی صورت میں نقل و حرکت متاثر نہ ہو۔
شہریوں کا کہنا ہے کہ ہر بار بارش کے بعد یہی صورتحال پیدا ہوتی ہے، مگر حکام کی جانب سے کوئی پائیدار حل نہیں نکالا گیا۔