دنیا بھر کے پاسپورٹس کی طاقت جانچنے والے معروف ادارے ہینلے اینڈ پارٹنرز نے سال 2025 کی تازہ عالمی درجہ بندی جاری کردی ہے جس میں پاکستانی پاسپورٹ نے معمولی مگر حوصلہ افزا پیش رفت کی ہے۔
خبر رساں ادارے کی رپورٹ کے مطابق ہینلے اینڈ پارٹنرز کی نئی رپورٹ میں پاکستان کا پاسپورٹ چار درجے بہتری کے بعد اب 96 ویں نمبر پر آگیا ہے۔
اگرچہ پاکستانی شہری اب بھی صرف 32 ممالک میں بغیر ویزے کے سفر کرسکتے ہیں تاہم پچھلے کچھ سالوں کے مقابلے میں یہ پیش رفت ایک مثبت اشارہ ہے۔
سنگاپور دنیا کا سب سے طاقتور پاسپورٹ برقرار
سنگاپور نے اس بار بھی اپنی برتری قائم رکھی ہے اور 193 ممالک میں ویزہ فری انٹری کی سہولت کے ساتھ دنیا کا سب سے طاقتور پاسپورٹ قرار پایا ہے۔ جاپان اور جنوبی کوریا مشترکہ طور پر دوسرے نمبر پر ہیں جن کے شہری 190 ممالک تک بغیر ویزہ جاسکتے ہیں۔
سعودی عرب بھی پاسپورٹ رینکنگ میں بہتری کے ساتھ نمایاں
اس فہرست میں سعودی عرب نے پانچ درجے ترقی کرتے ہوئے 54 ویں نمبر حاصل کرلیا ہے جس کے شہری اب 91 ممالک میں ویزہ فری یا ویزہ آن ارائیول کی سہولت حاصل کرسکتے ہیں۔
بھارت نے بھی پانچ درجے بہتری کے بعد 77 واں نمبر حاصل کیا ہے اور اس کے شہری 59 ممالک میں بغیر پیشگی ویزہ سفر کرسکتے ہیں۔
پاکستان کی بہتری، مگر چیلنجز باقی
پاکستانی پاسپورٹ کی درجہ بندی اگرچہ کچھ بہتر ہوئی ہے لیکن اب بھی جنوبی ایشیا کے دیگر ممالک جیسے بھارت، بنگلہ دیش اور سری لنکا کے مقابلے میں خاصی کمزور تصور کی جاتی ہے۔
امریکا اور برطانیہ کی درجہ بندی میں تنزلی
دلچسپ بات یہ ہے کہ 2014 اور 2015 میں سرفہرست رہنے والے امریکہ اور برطانیہ اب پیچھے جاچکے ہیں۔ برطانیہ چھٹے نمبر پر جب کہ امریکا 10 ویں نمبر پر آگیا ہے۔
رینکنگ کا معیار کیا ہے؟
ہینلے اینڈ پارٹنرز ہر ملک کے پاسپورٹ کو اس بنیاد پر اسکور دیتا ہے کہ وہ کتنے ممالک میں ویزہ فری، ویزہ آن ارائیول یا ای ٹی اے (الیکٹرانک ٹریول اتھارٹی) کے ذریعے داخل ہوسکتے ہیں۔ ایسے ممالک جہاں پیشگی منظوری لازمی ہو، وہاں پاسپورٹ کو کوئی پوائنٹ نہیں دیا جاتا۔