شہر قائد میں معروف ماڈل و اداکارہ حمیرا اصغر کی پراسرار موت کا معمہ مزید الجھ گیا ہے۔ پولیس نے ان کے فلیٹ سے ایسے شواہد برآمد کیے ہیں جو نہ صرف ناقابلِ فہم ہیں بلکہ اس معاملے کو مزید سنسنی خیز بنا رہے ہیں۔
پولیس ذرائع کے مطابق حمیرا کے فلیٹ کی تلاشی کے دوران تین سے چار مختلف جگہوں پر مٹی کے برتنوں میں سفید رنگ کا پاؤڈر رکھا ہوا ملا ہے جس کی موجودگی کی کوئی واضح وجہ سامنے نہیں آ سکی۔
تحقیقات کرنے والے افسران کا کہنا ہے کہ یہ سفید پاؤڈر بظاہر عام چیز معلوم نہیں ہوتا، اور ممکن ہے کہ اسی مواد کی وجہ سے فلیٹ میں موجود لاش سے بدبو نہیں پھیلی جو کہ ایک غیر معمولی بات ہے۔
مزید پڑھیں: حمیرا اصغر کیس میں اہم انکشافات سامنے آگئے
حمیرا کی لاش کئی ماہ پرانی تھی لیکن کسی بھی ہمسائے یا سیکیورٹی عملے کو کسی قسم کی بو محسوس نہیں ہوئی۔
پولیس نے فوری طور پر سفید پاؤڈر کے نمونے لیبارٹری بھیج دیے ہیں تاکہ یہ جانا جا سکے کہ آیا یہ کوئی کیمیائی مادہ ہے یا کوئی اور پراسرار عنصر جو لاش کی حالت پر اثر انداز ہوا ہو۔
ذرائع نے یہ بھی انکشاف کیا ہے کہ اداکارہ کے ملبوسات کو بھی کیمیکل ایگزامینیشن کے لیے بھیجا جا رہا ہے تاکہ مزید حقائق سامنے لائے جا سکیں۔
اب تک اداکارہ کی موت کی اصل وجہ کا تعین نہیں ہو سکا، اور پوسٹ مارٹم رپورٹ کا انتظار کیا جا رہا ہے۔ پولیس کا کہنا ہے کہ وہ اس پہلو پر بھی غور کر رہی ہے کہ آیا یہ قدرتی موت تھی، خودکشی یا کسی مجرمانہ کارروائی کا نتیجہ۔