پاکستان میں کاروباری برادری کی جانب سے متنازع فنانس بل اور سیلز ٹیکس ایکٹ کی شقوں کے خلاف احتجاج کی تیاریاں کی جا رہی تھیں۔ تاہم، ایف پی سی سی آئی اور مختلف چیمبرز کے درمیان اختلافات نے صورتحال کو پیچیدہ بنا دیا ہے۔
کچھ چیمبرز نے حکومت کے ساتھ مذاکرات کے بعد ہڑتال کی کال واپس لینے کا اعلان کیا، لیکن کچھ چیمبرز اس فیصلے سے متفق نہیں ہیں اور اپنے احتجاجی پروگرام کو جاری رکھنے پر بضد ہیں۔
کراچی چیمبر کے صدر جاوید بلوانی نے حکومت کے وعدوں پر عدم اعتماد کا اظہار کرتے ہوئے کہا کہ حکومت نے جو یقین دہانیاں کی تھیں، ان کی کوئی تحریری شکل نہیں دی گئی۔
انہوں نے کہا کہ ہم کل ہڑتال ضرور کریں گے، پورا شہر بند ہو گا، اور تمام مارکیٹ صدور ہمارے ساتھ ہوں گے۔
کراچی موبائل اینڈ الیکٹرونکس ڈیلرز ایسوسی ایشن کے صدر محمد منہاج گلفام نے بھی تصدیق کی کہ کراچی کی تمام الیکٹرونکس اور موبائل مارکیٹیں 19 جولائی کو بند رہیں گی۔
لاہور چیمبر کے صدر میاں ابو زر شاد نے حکومت کے ساتھ مذاکرات ناکام ہونے کا الزام عائد کرتے ہوئے کہا کہ تاجروں کے مسائل حل نہ ہونے پر ہم نے ہڑتال کا فیصلہ کیا ہے، حکومت کی بے حسی کے خلاف تاجر برادری کا بڑا فیصلہ ہو چکا ہے۔
انہوں نے احتجاج میں شرکت کی حمایت کا اعلان کیا اور تاجر برادری کو ایک دوٹوک پیغام دیا کہ اب وعدے نہیں، عمل چاہیے
دوسری جانب ایف پی سی سی آئی کے صدر عاطف اکرام شیخ نے ملک بھر میں کسی بھی ہڑتال کی مخالفت کرتے ہوئے کہا کہ حکومت نے بزنس کمیونٹی کے مطالبات کو تسلیم کرتے ہوئے متنازع شقوں کو واپس لے لیا ہے۔
انہوں نے اس بات کا بھی ذکر کیا کہ حکومت نے بزنس کمیونٹی کے تحفظات کو بہت اچھے طریقے سے سنا ہے اور اس بات کا امکان ہے کہ تمام معاملات اتفاق رائے سے حل ہو جائیں گے۔
عاطف اکرام شیخ نے مزید کہا کہ آج کے اجلاس کے فیصلوں کے بعد کل ملک بھر میں کہیں بھی ہڑتال نہیں ہو گی۔
راولپنڈی، سیالکوٹ اور دیگر چیمبرز نے بھی ایف پی سی سی آئی کے فیصلے کی حمایت کی ہے۔ سیالکوٹ چیمبر کے صدر اکرام الحق نے کہا کہ حکومت نے اجلاس میں مثبت روئیے کا مظاہرہ کیا ہے، اور اس وجہ سے احتجاج موخر کرنے کا فیصلہ کیا گیا ہے۔
ایف پی سی سی آئی کے سینئر نائب صدر ثاقب فیاض مگوں نے بھی تصدیق کی کہ کل ملک بھر میں کوئی ہڑتال نہیں ہو گی۔ انہوں نے کہا کہ حکومت نے تاجر برادری کے تحفظات پر متنازع شقوں کو واپس لے لیا ہے، جس سے کاروباری برادری کو ریلیف ملا ہے۔