صدرِ پاکستان اور وزیرِ اعظم کا کراچی میں گل پلازہ آتشزدگی پر اظہارِ افسوس

صدرِ پاکستان اور وزیرِ اعظم کا کراچی میں گل پلازہ آتشزدگی پر اظہارِ افسوس

وزیرِ اعظم نے زخمیوں کو تمام سہولیات فراہم کرنے اور جلد صحتیابی کی دعا کی

صدرِ مملکت آصف علی زرداری اور وزیرِ اعظم نے کراچی کے گل پلازہ میں پیش آنے والے افسوسناک آتشزدگی کے واقعے پر گہرے دکھ اور رنج کا اظہار کیا ہے۔

صدرِ پاکستان نے قیمتی انسانی جانوں کے ضیاع پر تعزیت کی اور جاں بحق افراد کے لواحقین کے ساتھ دلی ہمدردی کا اظہار کیا۔

انہوں نے سندھ حکومت اور متعلقہ اداروں سے کہا کہ وہ متاثرہ افراد اور تاجروں کو فوری اور ہر ممکن امداد فراہم کریں۔

صدر زرداری نے زخمیوں کے لیے بہترین طبی سہولیات کی فراہمی میں کسی بھی قسم کی کوتاہی نہ کرنے کی ہدایت کی اور دعا کی کہ اللہ تعالیٰ زخمیوں کو جلد صحتِ کاملہ عطا فرمائے اور متاثرہ خاندانوں کو صبرِ جمیل دے۔

وزیرِ اعظم نے بھی واقعے پر افسوس کا اظہار کرتے ہوئے کہا کہ لوگوں کی جان و مال کی حفاظت کے لیے تمام تر اقدامات کیے جائیں۔

انہوں نے متعلقہ اداروں سے ریسکیو آپریشن میں بھرپور تعاون کرنے اور متاثرہ تاجروں اور دیگر افراد کو ہر ممکن امداد فراہم کرنے کی ہدایت کی۔

وزیرِ اعظم نے جاں بحق افراد کے لواحقین کے غم میں برابر کے شریک ہونے کا اظہار کیا اور زخمیوں کو تمام سہولیات فراہم کرنے اور جلد صحتیابی کی دعا کی۔