جنوبی پنجاب کے ضلع علی پور میں سیلابی صورتحال بدترین شکل اختیار کر گئی ہے۔ یونین کونسل سلطان پور کے نواحی علاقہ کوٹلہ مہر علی میں سیلابی ریلے داخل ہونے سے قیامت صغریٰ کے مناظر دیکھنے میں آ رہے ہیں۔
سیلابی پانی اچانک بستی میں داخل ہونے کے باعث سینکڑوں افراد اپنے گھروں میں محصور ہو کر رہ گئے ہیں۔ پانی کی شدت سے متعدد مکانات منہدم ہو چکے ہیں جبکہ مقامی لوگ سر پر چھت کا سایہ کھو بیٹھے ہیں۔
انتہائی افسوسناک امر یہ ہے کہ واقعے کو کئی گھنٹے گزرنے کے باوجود تاحال کوئی سرکاری ریسکیو آپریشن شروع نہیں کیا جا سکا۔ مقامی افراد اپنی مدد آپ کے تحت ڈرموں پر چارپائیاں رکھ کر ایک دوسرے کو پانی سے نکالنے کی کوششوں میں مصروف ہیں۔
عینی شاہدین کے مطابق علاقے میں خوراک، صاف پانی اور ابتدائی طبی امداد کی شدید قلت پیدا ہو چکی ہے، جبکہ خواتین، بچے اور بزرگ سب سے زیادہ متاثر ہیں۔