اسلام آباد: وزیراعظم شہباز شریف نے کہا ہے کہ میجر راجہ عزیز بھٹی شہید نے 65 کی جنگ میں جرأت و بہادری کی ایسی مثال قائم کی جو رہتی دنیا تک یاد رکھی جائے گی۔
وزیراعظم نے میجر راجہ عزیز بھٹی شہید نشان حیدر کے 60ویں یوم شہادت پر انہیں خراج عقیدت پیش کرتے ہوئے کہا کہ میجر راجہ عزیز بھٹی شہید نشان حیدر اور ان کے اہل خانہ پر مجھ سمیت پوری قوم کو فخر ہے۔
انہوں نے کہا کہ مسلسل پانچ دن تک دشمن کے حملوں کو پسپا کرکے میجر راجہ عزیز بھٹی شہید نشان حیدر نے دشمن کے لاہور پر قبضہ کرکے جشن منانے کے ناپاک عزائم کو خاک میں ملا دیا۔
وزیراعظم کا کہنا ہے کہ افواج پاکستان ارض وطن کے دفاع کیلئے دن رات مصروف عمل ہیں، جب بھی دشمن نے پاکستان کو میلی آنکھ سے دیکھا، میجر راجہ عزیز بھٹی شہید نشان حیدر کی طرح پاک فوج کے افسران و جوانوں نے سیسہ پلائی دیوار کی طرح وطن عزیز کا تحفظ کیا۔
شہباز شریف نے مزید کہا کہ پاکستان کے تحفظ کے غیر متزلزل عزم میں مجھ سمیت پوری قوم اپنی بہادر افواج کے ساتھ شانہ بشانہ کھڑی ہے۔