پنجاب، سندھ اور خیبر پختونخوا کے سیلاب سے متاثرہ علاقوں میں پاک بحریہ کا امدادی آپریشن جاری ہے۔
کشمور، گھوٹکی، سکھر اور شکار پور کے اضلاع میں سیلابی پانی میں گھرے افراد کے انخلاء کے لیے پاک بحریہ نے فوری طور پر ہوور کرافٹس تعینات کر دیے ہیں، ہوور کرافٹس زمین، پانی اور دلدلی علاقوں میں آپریشن کی صلاحیت رکھتے ہیں۔
پاک بحریہ نے کشمور، گھوٹکی، سکھر اور شکار پور کے علاقوں سے 4335 سیلاب متاثرین افراد کو نکال کر محفوظ مقام پر منتقل کیا۔ متاثرین کے انخلاء کے لیے پاک بحریہ کے جدید ہوورکرافٹس اور کشتیاں استعمال کی جارہی ہیں۔
پاک بحریہ نے خیبرپختونخوا میں سوات، بونیر اور شانگلا میں سیلاب متاثرین کے لئے میڈیکل کیمپس بھی قائم کیے، امدادی ٹیمیں سیلاب متاثرین کو راشن، طبی امداد اور ادویات بھی مہیا کر رہی ہیں۔
قصور، راجن پور، ڈیرہ اسماعیل خان، میر پور خاص، سکھر، سانگھڑ اور سجاول کے علاقوں میں بھی پاک بحریہ کا ریلیف اینڈ ریسکیو آپریشن جاری ہے، تاہم پاک بحریہ مشکل میں گھرے ہم وطنوں کی مدد کے لیے ہمہ وقت تیار اور پر عزم ہے۔