دبئی میں ایشیا کپ 2025 کی ٹرافی کی شاندار تقریب رونمائی منعقد ہوئی جس میں صدر آئی سی سی محسن نقوی اور ایونٹ میں شریک تمام ٹیموں کے کپتانوں نے شرکت کی۔
میڈیا رپورٹس کے مطابق دبئی میں ایشیا کپ 2025 کی ٹرافی کی شاندار تقریب رونمائی منعقد ہوئی جس میں ایونٹ میں شریک تمام ٹیموں کے کپتان اور ایشین کرکٹ کونسل کے صدر محسن نقوی بھی موجود تھے۔
تقریب کو شاندار انداز میں سجایا گیا اور ٹورنامنٹ سے قبل شائقینِ کرکٹ میں جوش و خروش بڑھ گیا۔
بھارتی کپتان سوریا کمار یادیو نے میڈیا سے گفتگو کرتے ہوئے کہا کہ ٹیم کی تیاری اچھی ہے، تمام ٹیموں کے ساتھ بیٹھنا خوشگوار تجربہ ہے، ٹی ٹوئنٹی فارمیٹ کافی چیلنجنگ ہوتا ہے اور اس میں کوئی بھی ٹیم جیتنے کی صلاحیت رکھتی ہے۔
پاکستانی کپتان سلمان علی آغا نے کہا کہ قومی ٹیم مکمل طور پر تیار ہے، ہم اچھی کرکٹ کھیلتے آرہے ہیں، تمام کھلاڑی ایشیا کپ کیلئے تیار ہیں، چند کھلاڑیوں کے لیے یہ پہلا بڑا ایونٹ ہے، لیکن ہم سب اس چیلنج کے لیے تیار ہیں۔
افغانستان کے کپتان راشد خان نے کہا کہ ہم اچھی کرکٹ کھیلنے پر توجہ دے رہے ہیں، سیمی فائنل کے بارے میں ابھی نہیں سوچ رہے۔ ورلڈکپ کے سیمی فائنل میں پہنچنا ہمارے لیے بڑا اعزاز تھا۔
عمان کرکٹ ٹیم کے کپتان نے کہا کہ یہ ہمارے لیے تاریخی لمحہ ہے۔ پہلی بار ایشیا کپ کھیلنے جا رہے ہیں۔ تین ورلڈکپ کھیل چکے ہیں اور ایشیا کپ کیلئے مکمل طور پر تیار ہیں۔
واضح رہے کہ ایشیا کپ 2025 کا ایونٹ دبئی میں ایک بڑے کرکٹ فیسٹیول کی شکل اختیار کرنے جا رہا ہے، جہاں خطے کی بہترین ٹیمیں مدِ مقابل ہوں گی اور شائقین کو سنسنی خیز مقابلے دیکھنے کو ملیں گے۔
