میٹا کی ملکیتی میسجنگ ایپ واٹس ایپ ایک بڑا فیچر متعارف کرانے جارہی ہے جس کے تحت صارفین اب یونیک یوزرنیم کے ذریعے ایک دوسرے سے جڑسکیں گے۔ اس کے بعد فون نمبر شیئر کرنے کی ضرورت نہیں رہے گی۔
ٹیکنالوجی ویب سائٹ کے مطابق یہ فیچر اینڈرائیڈ بیٹا ورژن 2.25.24.22 میں دیکھا گیا ہے اور یہ ابھی ترقی کے آخری مراحل میں ہے۔ یہ فیچر ٹیلیگرام جیسے پلیٹ فارمز کے ماڈل سے ملتا جلتا ہے اور صارفین کی پرائیویسی اور کنٹرول میں بڑی بہتری لائے گا۔
فیچر کیسے کام کرے گا؟
یوزرنیم بنائیں
صارفین کو 3 سے 30 حروف پر مشتمل ایک منفرد یوزرنیم منتخب کرنا ہوگا جس میں کم از کم ایک حرف لازمی ہوگا اور مخصوص علامات استعمال نہیں کی جاسکیں گی۔
ڈائریکٹ سرچ
’’چَیٹس‘‘ ٹیب میں نیا سرچ آپشن یوزرنیم کے ذریعے دوسرے افراد کو تلاش کرنے کی سہولت دے گا، چاہے وہ آپ کے کانٹیکٹ لسٹ میں نہ ہوں۔
نمبر چھپائیں
صرف یوزرنیم اور پروفائل تصویر نظر آئے گی۔ آپ کا فون نمبر اس وقت تک پوشیدہ رہے گا جب تک آپ خود شیئر نہ کریں۔
محفوظ چیٹ
یوزرنیم کے ذریعے شروع ہونے والی گفتگو بھی عام چیٹ کی طرح ہوگی اور اس میں میڈیا، وائس نوٹس اور دستاویزات بھیجنے کی سہولت ہوگی اور وہ بھی سب کچھ اینڈ ٹو اینڈ انکرپشن کے ساتھ۔
اضافی سیکیورٹی
محض یوزرنیم جاننے سے کوئی بھی آپ کو میسج نہیں بھیج سکے گا جب تک اس کے پاس متعلقہ کی موجود نہ ہو۔
اسپیم کنٹرول
واٹس ایپ اسپیم اور غیر ضروری میسجز روکنے کے لیے نئے سسٹمز استعمال کرے گا تاکہ صارفین محفوظ رہیں۔
یہ فیچر کیوں اہم ہے؟
ماہرین کے مطابق یہ تبدیلی واٹس ایپ کے ان صارفین کے لیے انقلابی ہے جو گروپ چیٹس یا نئے لوگوں سے بات کرنے کے لیے اپنا فون نمبر دینے پر مجبور ہوتے تھے جس سے ان کے نمبر دیگر ایپس پر غلط استعمال یا اسکیمز کے ذریعے نقصان دہ سرگرمیوں کا شکار ہوسکتے تھے۔
یہ فیچر اختیاری ہوگا۔ صارف چاہے تو یوزرنیم بناکر استعمال کرے یا پرانے طریقے یعنی فون نمبر کے ذریعے۔ بیٹا ٹیسٹنگ مکمل ہونے کے بعد یہ اپڈیٹ آئندہ چند مہینوں میں دنیا بھر کے صارفین کے لیے دستیاب ہوگی۔