بیلجیم کے وزیر خارجہ میکسم پریوو نے اعلان کیا ہے کہ ان کا ملک رواں ماہ اقوام متحدہ کی جنرل اسمبلی کے اجلاس میں فلسطین کو بطور ریاست تسلیم کرے گا اور اسرائیل پر 12 سخت پابندیاں عائد کرے گا۔
وزیر خارجہ، جو نائب وزیراعظم بھی ہیں، نے سوشل میڈیا پلیٹ فارم ایکس پر لکھا کہ فلسطین کو بیلجیم تسلیم کرے گا اور اسرائیلی حکومت کے خلاف مضبوط پابندیاں عائد کی جائیں گی۔
انھوں نے کہا کہ ان پابندیوں میں غیر قانونی اسرائیلی آبادکاروں سے مصنوعات کی درآمد پر پابندی اور اسرائیلی کمپنیوں کے ساتھ سرکاری خریداری پالیسیوں کا ازسرنو جائزہ شامل ہے۔
مزید پڑھیں: بیلجیئم، ہفتے میں چار دن کام، تین دن آرام
میکسم پریوو کا کہنا ہے کہ یہ اقدام فلسطین، خصوصاً غزہ میں جاری انسانی المیے کے پیشِ نظر کیا جا رہا ہے۔ تاہم انہوں نے واضح کیا کہ باضابطہ تسلیم اسی وقت کیا جائے گا جب آخری یرغمالی رہا کر دیا جائے اور حماس کا فلسطینی امور میں کوئی کردار باقی نہ رہے۔
بیلجیم کے وزیراعظم بارٹ ڈی ویور پہلے ہی کہہ چکے ہیں کہ فلسطین کی تسلیمیت سخت شرائط سے مشروط ہونی چاہیے۔
اسی تناظر میں فرانس اور سعودی عرب 22 ستمبر کو جنرل اسمبلی کے اجلاس میں فلسطینی ریاست کے باضابطہ اعتراف کے لیے اجلاس کی میزبانی کریں گے۔ آسٹریلیا، کینیڈا اور برطانیہ بھی اس ماہ فلسطین کو تسلیم کرنے کا عندیہ دے چکے ہیں۔
یہ اعلان ایسے وقت میں سامنے آیا ہے جب غزہ پر اسرائیلی حملوں میں اب تک 63 ہزار سے زائد افراد شہید اور ایک لاکھ 60 ہزار سے زیادہ زخمی ہو چکے ہیں، جبکہ بیلجیم نے حال ہی میں دو اسرائیلی فوجیوں کے خلاف جنگی جرائم کی شکایات عالمی فوجداری عدالت کو بھیج دی ہیں۔