جنوبی کوریا کے معروف اداکار گونگ یو کو جنسی ہراسانی کے کیس میں عدالت سے بڑا ریلیف مل گیا ہے جبکہ ان پر جھوٹے الزامات عائد کرنے والی خاتون کو سزا سنائی گئی ہے۔
جنوبی کوریائی خبر رساں اداروں کے مطابق سیئول کی عدالت نے 29 جولائی کو دیے گئے فیصلے میں گونگ یو کے خلاف جنسی ہراسانی کے الزامات کو بے بنیاد قرار دیا اور اداکار کو تمام الزامات سے بری کر دیا۔
عدالتی فیصلے کے مطابق 40 سالہ خاتون جس کی شناخت ظاہر نہیں کی گئی، انہوں نے سوشل میڈیا پر 2020 اور 2021 میں گونگ یو کے خلاف جنسی ہراسانی کے سنگین الزامات عائد کیے تھے، جو بعد ازاں جھوٹے ثابت ہوئے۔
عدالت نے خاتون کو جھوٹے الزامات کے ذریعے اداکار کی ساکھ کو نقصان پہنچانے، سوشل میڈیا پر جھوٹی معلومات پھیلانے اور انفارمیشن نیٹ ورک پروٹیکشن ایکٹ کی خلاف ورزی کا مرتکب قرار دیتے ہوئے 6 ماہ قید کی سزا سنائی ہے۔
فیصلے میں کہا گیا کہ جھوٹے الزامات نہ صرف مدعا علیہ کی شہرت کے لیے نقصان دہ تھے بلکہ اس سے سوشل میڈیا پر غلط معلومات کی حوصلہ افزائی بھی ہوئی، جو معاشرتی طور پر خطرناک رویہ ہے۔
واضح رہے کہ گونگ یو نیٹ فلکس کی عالمی شہرت یافتہ سیریز “Squid Game” سمیت دیگر معروف کوریائی ڈراموں میں اپنی اداکاری کے جوہر دکھا چکے ہیں جبکہ ان پر لگنے والے الزامات نے ان کے مداحوں کو شدید تشویش میں مبتلا کر دیا تھا۔
عدالتی فیصلے کے بعد گونگ یو کے وکیل نے اطمینان کا اظہار کرتے ہوئے کہا کہ حق اور سچ سامنے آگیا ہے اور یہ فیصلہ جھوٹے الزامات کے خلاف ایک مضبوط پیغام ہے۔
