رشتوں میں دراڑ؛رجب بٹ کی اپنی اہلیہ کےبھائی کووارننگ، اختلافات کھل کرسامنےآگئے

پاکستانی فیملی وی لاگر رجب بٹ، جو اپنی فری اسٹائل ویڈیوز کے ذریعے شہرت کی بلندیوں پر پہنچے، اب مختلف تنازعات اور قانونی مسائل کی وجہ سے خبروں کی زینت بنے ہوئے ہیں، ان پر مختلف مقدمات بھی درج ہو چکے ہیں جبکہ ان کی ذاتی زندگی، خصوصاً شادی بھی سوشل میڈیا پر زیر بحث رہی ہے۔

حال ہی میں ایک نئے تنازعے کے بعد رجب بٹ نے وی لاگنگ سے عارضی کنارہ کشی کا اعلان کیا ہے، تنازعہ اس وقت شدت اختیار کر گیا جب ان کے قریبی دوستوں کی چند نازیبا ویڈیوز لیک ہو گئیں، جن پر سوشل میڈیا پر شدید ردعمل دیکھنے کو ملا۔

رجب بٹ نے ایک وی لاگ کے ذریعے اس معاملے پر اپنی پوزیشن واضح کرتے ہوئے کہا کہ یہ ویڈیوز ان کے “کم ظرف دشمنوں” نے لیک کی ہیں اور چھ کلپس مصنوعی ذہانت (AI) کی مدد سے تیار کی گئی ہیں۔

ان کا کہنا تھا کہ وہ ابتدا میں اس معاملے پر بات نہیں کرنا چاہتے تھے لیکن اپنے فالوورز کے اعتماد کے لیے وضاحت دینا ضروری سمجھا۔

وی لاگ میں رجب نے انکشاف کیا کہ ان کی اہلیہ ایمان اس وقت میکے میں ہیں، تاہم انہوں نے ایمان کے بھائی کے ایک حالیہ لائیو سیشن پر ردعمل دیتے ہوئے کہا کہ آپ کیسے کہہ سکتے ہیں کہ ایمان کو سوشل میڈیا پر آنے کی اجازت نہیں ہے؟ میں نے کبھی اس پر کسی چیز کی پابندی نہیں لگائی۔

رجب بٹ نے مزید کہا کہ ایمان کو ذاتی آزادی حاصل ہے، یہاں تک کہ اسے شام 5 بجے تک سونے سے بھی کوئی نہیں روکتا۔

 انہوں نے دعویٰ کیا کہ ایمان کے طبی اخراجات بھی انہوں نے خود برداشت کیے لیکن اس کا ذکر نہیں کیا گیا۔

اپنے پیغام میں انہوں نے ایمان کے بھائی کو مخاطب کرتے ہوئے کہا کہ آپ بھی اپنے والدین کے اکلوتے بیٹے ہیں، لہٰذا ایمان کو ویوز اور سوشل میڈیا شہرت کے لیے استعمال نہ کریں۔

آخر میں رجب بٹ نے اعتراف کیا کہ ان کے اور ایمان کے درمیان کچھ ذاتی اختلافات ضرور ہیں اور میں چاہتا ہوں کہ یہ مسائل نجی سطح پر ہی حل کیے جائیں۔