وفاقی وزیر مذہبی امور سردار محمد یوسف نے حج پالیسی 2026 کے حوالے سے نیوز کانفرنس کرتے ہوئے اعلان کیا ہے کہ وفاقی کابینہ نے آئندہ سال کے لیے حج پالیسی کی باقاعدہ منظوری دے دی ہے۔
منظوری کے تحت 4 اگست 2025 سے سرکاری حج اسکیم کے لیے درخواستوں کی وصولی کا آغاز کیا جائے گا۔
وفاقی وزیر کے مطابق، سرکاری حج اسکیم کے تحت ایک لاکھ 19 ہزار 210 عازمین کو حج کی سعادت حاصل ہوگی۔
انہوں نے وضاحت کی کہ حج درخواست کے لیے پاکستانی پاسپورٹ کا حامل ہونا ضروری ہے، جبکہ 12 سال سے کم عمر بچوں کو رواں سال حج پر جانے کی اجازت نہیں دی جائے گی۔
سردار محمد یوسف نے بتایا کہ سرکاری حج اسکیم کے اخراجات کا تخمینہ ساڑھے 11 لاکھ سے ساڑھے 12 لاکھ روپے کے درمیان رکھا گیا ہے۔
عازمین کی سہولت کے پیشِ نظر حج اخراجات دو اقساط میں ادا کرنے کی سہولت فراہم کی جا رہی ہے۔
وفاقی وزیر نے کہا کہ سعودی عرب سے منظور شدہ ویکسین لگوانا ہر عازم حج کے لیے لازمی قرار دیا گیا ہے، اور حج سے متعلق مکمل تربیت تمام عازمین کو فراہم کی جائے گی۔
انہوں نے مزید کہا کہ عازمین حج کی خدمت اور معاونت کے لیے خصوصی ٹیمیں تشکیل دی جائیں گی، جو سعودی عرب میں ان کی رہنمائی، طبی امداد اور دیگر سہولیات کی فراہمی کو یقینی بنائیں گی۔
